Në kuadër të kontrolleve të shtuara për parandalimin e veprimtarive të kundërligjshme ndërkufitare, zyrtarët e Policisë së Kosovës kanë ndaluar për kontroll në vijën e dytë një automjet me targa të Serbisë (VA), në të cilin ndodheshin dy shtetas. Pas dyshimeve të bazuara, policia ushtroi një kontroll të detajuar mbi mjetin dhe pasagjerët.
Gjatë këtij kontrolli, policia gjeti dhe sekuestroi një sërë sendesh, të cilat u morën si prova materiale:
• 5 thika, ku dy prej tyre janë klasifikuar si taktike apo luftarake;
• 2 bluza me simbole dhe mbishkrime nacionaliste si “Freedom or Death”, “Defend Europe since – 1312” dhe “Regrut”;
• 1 kamerë Go-Pro me mbajtës;
• 2 pajisje multifunksionale;
• 1 flamur i Serbisë;
• 1 vulë me katër shkronja “S” dhe mbishkrimin “Udruzenje Ljubitelja Srednjvekovnih Borilackih Sportova, Sremski Karlovci”;
• 1 kartë identiteti.
Në lidhje me këtë ngjarje, Prokurori i Shtetit ka autorizuar inicimin e rastit për veprën penale “Mbajtja në pronësi, kontroll ose posedim të paautorizuar i armëve”. Dy personat e dyshuar janë ndaluar dhe dërguar në mbajtje, ndërsa veprimet e mëtejshme hetimore mbeten nën procedurë.