Shoqata e kamionistëve të Maqedonisë së Veriut ka njoftuar grevë për pezullimin e qarkullimit të mallrave drejt disa vendeve të Ballkanit Perëndimor dhe Bashkimit Evropian. Kjo u raportua më 26 janar 2026, ndërsa në pikën doganore të Qafë Thanës janë regjistruar hyrje të pakta kamionësh dhe mjetesh të tjera transporti nga Maqedonia e Veriut.
Kamionët që kanë hyrë kanë kryer procedurat doganore në të dyja doganat dhe më pas janë nënshtruar kontrollit me skaner, duke respektuar protokollet në fuqi. Autoritetet doganore shqiptare po monitorojnë situatën.
Sipas njoftimit të shoqatës, greva lidhet me numërimin e ditëve të qëndrimit të shoferëve në vendet e BE-së, praktikë që sjell pasoja për shkak të kufizimit të kohës së lejuar në territorin evropian. Kjo shkakton penalitete dhe kufizime në ushtrimin e veprimtarisë së tyre.
Ministria e Transporteve e Maqedonisë së Veriut ka shprehur mbështetje për grevën, ndërsa pritet reagim nga autoritetet e Bashkimit Evropian. Pezullimi i plotë i lëvizjes së mjeteve të tonazhit të rëndë drejt dhe nga Maqedonia e Veriut pritet të nisë sot në orën 12:00.
Përditësime
Lëvizja e kamionëve u bllokua plotësisht në Qafë Thanë pas orës 12:00.
Greva përfshin kamionistët nga Maqedonia e Veriut, Mali i Zi, Bosnja dhe Serbi, kundër kufizimeve në zonën Shengen.
Përjashtime lejohen për kamionët që transportojnë ilaçe, kafshë të gjalla, municione ose armë.