Kapiteneria e Portit të Durrësit organizoi një operacion shpëtimi për jahtin Infinity Nine, pasi mjeti lundrues me flamur të Maltës kërkoi ndihmë si pasojë e një defekti teknik në motor. Ngjarja ndodhi rreth 20 milje në perëndim të zonës së Bisht Pallës.
Rimorkimi i sigurt i jahtit u mundësua nga koordinimi i autoriteteve portuale me ekuipazhin e anijes Nautica, e cila ndodhej në afërsi dhe operohet nga kompania Albsea Transport. Jahti ka mbërritur në radën e Portit të Durrësit rreth mesnatës.
Autoritetet detare vlerësuan gatishmërinë dhe profesionalizmin e ekuipazhit të anijes Nautica, duke theksuar se bashkëpunimi i shpejtë ishte vendimtar për përfundimin me sukses të operacionit dhe garantimin e sigurisë në det.