Prokuroria Themelore Publike për Ndjekjen e Krimit të Organizuar dhe Korrupsionit ka nxjerrë urdhër për zhvillimin e procedurës hetimore ndaj katër personave, të dyshuar për pjesëmarrje në një grup kriminal, zhvatje dhe pastrim parash. Për tre prej tyre i është dorëzuar gjyqtarit të procedurës paraprake në Gjykatën Themelore Penale në Shkup propozimi për caktimin e paraburgimit. I dyshuari i katërt ndodhet prej një periudhe jashtë vendit.
Sipas hetimit, grupi ishte formuar nga i dyshuari i parë, banor i Kumanovës, dhe vepronte që nga viti 2021. Të dyshuarit akuzohen se u merrnin para personave të dëmtuar përmes kërcënimeve, duke shfrytëzuar varësinë e tyre financiare pas marrjes së huave. Ata dyshohet se përdornin llogaritë bankare të të dëmtuarve për të transferuar para të përfituara nga zhvatja, të paraqitura si hua formale, dhe më pas i tërhiqnin në para të gatshme.
Në një rast, një grua kishte marrë hua 4.000 euro, me marrëveshje gojore për ta kthyer brenda një muaji dhe për të paguar 2.500 euro interes. Pasi ajo kishte shlyer shumën e dakorduar, i dyshuari i parë i kërkoi të përdorte llogarinë e saj bankare për të vënë në qarkullim para të përfituara nga zhvatja. Pas refuzimit, ai dyshohet se e kërcënoi dhe kërkoi që automjeti i saj të vihej si peng për një borxh të pretenduar.
Sipas Prokurorisë, me urdhër të të dyshuarit u përgatitën një kontratë fiktive për shitblerjen e automjetit dhe një kontratë huaje prej 1.000.000 denarësh. Të dyshuarit dyshohet se falsifikuan nënshkrimin e gruas dhe i noterizuan dokumentet pa dijeninë e saj. Më pas, pronësia e automjetit u bart në emër të njërit prej të dyshuarve. Grupi dyshohet se vazhdoi t’i kërkonte gruas automjetin dhe pagesën e borxhit të pretenduar.
Një person tjetër kishte marrë në vitin 2021 dy hua prej 180.000 denarësh secila për trajtimin mjekësor të bashkëshortes. Edhe pse i kishte kthyer paratë, të dyshuarit vazhduan t’i kërkonin pagesa shtesë në emër të interesit. Sipas hetimit, ata e detyruan të vinte llogarinë e tij bankare në dispozicion të grupit për transferimin e shumave të mëdha të parave të përfituara nga zhvatja.
Noteri që dyshohet se lejoi noterizimin e dokumenteve të rreme hetohet për punë të pandërgjegjshme në shërbim. Për të është kërkuar caktimi i masave të kujdesit.
Drejtori i Byrosë për Siguri Publike, Aleksandar Janev, tha se policia ka prova dhe fakte për aktivitetet e të dyshuarve nga viti 2021 e deri më sot. Sipas tij, aksioni pasoi pasi një qytetar njoftoi Ministrinë e Punëve të Brendshme. Janev tha se janë kryer bastisje në lokacionet e të dyshuarve, ku janë gjetur shuma të mëdha parash dhe dokumente që, sipas tij, dëshmojnë për huadhënie dhe zhvatje. Ai shtoi se është propozuar edhe bastisja e një zyre noteriale në Kumanovë dhe se është njoftuar Banka Popullore, pasi janë gjetur mjete financiare që dyshohet se kanë origjinën nga një këmbimore në pronësi të vëllait të njërit prej të dyshuarve.
Të dyshuarit prezumohen të pafajshëm deri në një vendim të formës së prerë.