Policia e Kosovës, përmes Drejtorisë për Hetimin e Krimeve Ekonomike dhe Korrupcionit, ka arrestuar dy zyrtarë të një banke. Ata dyshohen se ngarkuan një qytetare me kredi prej 25 mijë euro pa dijeninë e saj.
Sipas njoftimit të policisë, menaxheri bankar tejkaloi autorizimet ligjore dhe urdhëroi lirimin e 24 mijë eurove. Analisti bankar ekzekutoi urdhrin verbal dhe transferoi 12 mijë euro në llogarinë e secilit nga dy bizneset.
Pas këtyre veprimeve, kredia u ngarkua me procedurë përmbarimore dhe banka e kallëzoi çështjen penalisht në Prokurori, pa paraqitur prova për realizimin e kredisë. Të dyshuarit janë intervistuar në prani të mbrojtësve të tyre.
Me aktvendim të prokurorit, u është caktuar masa e ndalimit prej 48 orësh. Hetimet vazhdojnë për të zbardhur të gjitha transaksionet financiare dhe përgjegjësitë e mundshme.