Ushtarët e misionit të KFOR-it zhvilluan një ushtrim të përbashkët trajnimi për të përmirësuar reagimin ndaj situatave emergjente, duke përfshirë rastet e zjarreve dhe nevojën për ndihmë mjekësore. Stërvitja është mbajtur në Kampin Bondsteel, me pjesëmarrjen e personelit të KFOR-it, zjarrfikësve dhe ekipeve të emergjencës mjekësore.
Sipas njoftimit zyrtar, aktiviteti ka pasur për qëllim forcimin e kapaciteteve operacionale, rritjen e ndërveprimit profesional dhe përmirësimin e koordinimit në terren. Përmes këtij bashkëpunimi, ekipet synojnë forcimin e procedurave që mbështesin mbrojtjen e njerëzve, infrastrukturës dhe shërbimeve kritike.
Në deklaratën e misionit theksohet se këto aktivitete dëshmojnë përkushtimin e vazhdueshëm të KFOR-it për të punuar me institucionet dhe partnerët lokalë. Objektivi kryesor mbetet kontributi për një mjedis të sigurt dhe stabil për të gjithë qytetarët e Kosovës.