KFOR ka reaguar ndaj pretendimeve që qarkullojnë në rrjetet sociale se NATO ka lëshuar raketa nga Camp Bondsteel apo objekte të tjera në Kosovë drejt Iranit, duke i cilësuar ato si të pavërteta.
Në një njoftim për shtyp, KFOR thekson se ky pretendim është i rremë dhe se NATO e hedh poshtë plotësisht.
Sipas njoftimit, Sekretari i Përgjithshëm i NATO-s, Mark Rutte, ka bërë të qartë se NATO si organizatë nuk është e përfshirë në fushatën aktuale ajrore kundër regjimit iranian.
Njoftimi vlerëson rolin kyç të Shteteve të Bashkuara në mbështetje të sigurisë së qëndrueshme në Kosovë dhe stabilitetit rajonal në kuadër të misionit të KFOR-it të udhëhequr nga NATO.
Shtetet e Bashkuara kanë pothuajse 600 trupa të dislokuara në KFOR dhe udhëheqin Komandën Rajonale Lindje (RC-East).
RC-East kontribuon në aktivitetet e përditshme të KFOR-it përmes:
- patrullimeve;
- ushtrimeve;
- angazhimeve me përfaqësues të të gjitha komuniteteve lokale;
- mbështetjes për projekte rindërtimi dhe zhvillimi ekonomik.
KFOR rithekson se misioni i tij vazhdon të përmbushë mandatin për të kontribuar në një mjedis të sigurt dhe të qetë për të gjithë njerëzit që jetojnë në Kosovë, në përputhje me Rezolutën e Këshillit të Sigurimit të OKB-së.