Gjatë ceremonisë përmbyllëse të procesit të vettingut, kreu i Prokurorisë së Posaçme (SPAK), Klodian Braho, vlerësoi ndikimin e këtij procesi në ndërtimin e besimit publik ndaj institucioneve. Sipas Braho, vettingu ishte një domosdoshmëri për ripërtëritjen e sistemit të drejtësisë, duke mundësuar kalimin e gjyqtarëve dhe prokurorëve në filtra të sigurt.
Kreu i SPAK vuri theksin te përgjegjësia individuale, duke deklaruar se besimi i qytetarëve te drejtësia nuk mund të kërkohet pa këtë element kyç. Ai shtoi se standardet e vettingut reflektohen tashmë në punën e përditshme të sistemit.
“Institucionet e reja të dala nga reforma në drejtësi kanë arritur pjekurinë e nevojshme për të përfaqësuar interesin publik me profesionalizëm dhe paanshmëri. Tani duhet të ruajmë standardet që kemi arritur”, u shpreh Braho. Në mbyllje të fjalës së tij, ai falënderoi të gjithë kontribuesit në këtë proces historik.