Petro Koçi, ish-deputet socialist, u shpreh se Këshilli i Mandateve nuk duhet të presë vendim nga Gjykata Kushtetuese për t’u mbledhur lidhur me kërkesën e Prokurorisë së Posaçme kundër Korrupsionit dhe Krimit të Organizuar (SPAK) për arrestimin e Belinda Ballukut, zëvendës kryeministres dhe ministres së Infrastrukturës dhe Energjisë.
Ai foli në një intervistë për News 24, ku sqaroi se argumenti për pritjen e Gjykatës Kushtetuese nuk qëndron, pasi janë dy çështje të veçanta. SPAK, përmes Gjykatës së Posaçme Kundër Korrupsionit dhe Krimit të Organizuar (GJKKO), ka kërkuar leje për arrest për shkak të dyshimeve për prishje hetimesh ose intimidim dëshmitarësh. Ndërsa Gjykata Kushtetuese po shqyrton në parim kompetencën e SPAK-ut dhe GJKKO-së për pezullimin e një ministre, duke krijuar precedent.
Koçi nënvizoi se ndjekja penale i drejtohet Ballukut si ministre, jo si zëvendës kryeministre. Ai u shpreh se Parlamenti duhet të japë lejen për heqjen e imunitetit dhe kritikoi hipokrizinë e opozitës, që e quan Sali Berishën të përndjekur politik, por kërkon vazhdimin e ndjekjes penale ndaj Ballukut.
Balluku është e marrë e pandehur për tenderin e tunelit të Llogarasë dhe nën hetim për procedura të tjera tenderuese. Koçi theksoi se SPAK duhet të ruajë provat dhe të rrijë besnik objektivave të saj.