Komandanti i Forcës së Sigurisë së Kosovës, gjenerallejtënant Bashkim Jashari, zhvilloi një takim me të ngarkuarin me punë të Ambasadës së Gjermanisë në Kosovë, Christian Bottcher. Takimi u njoftua nga Ambasada Gjermane në Kosovë si dhe nga FSK-ja përmes një postimi në Facebook.
Gjatë bisedës, palët trajtuan procesin e transformimit dhe të ardhmen e FSK-së. Jashari shprehu mirënjohje për mbështetjen shumëvjeçare të Gjermanisë në zhvillimin e forcës që nga themelimi i saj. Bottcher rikonfirmoi përkushtimin e Gjermanisë për ta parë Kosovën dhe institucionet e saj të sigurisë si pjesë të një arkitekture të përbashkët evropiane të sigurisë.
Diskutimet përfshiu zhvillimet aktuale të FSK-së, prioritetet dhe nevojat e saj, si dhe planifikimin për të ardhmen. Palët shkëmbyen qëndrime për situatën e sigurisë dhe nevojën për bashkëpunim në përballjen me sfidat e përbashkëta. Bottcher shprehu vlerësimin për bashkëpunimin e fortë dhe konstruktiv me FSK-në.
Në përfundim të takimit, Jashari falënderoi Gjermaninë për kontributin e vazhdueshëm në ngritjen dhe avancimin e FSK-së gjatë të gjitha fazave të saj. Të dyja palët u pajtuan për rëndësinë e thellimit të bashkëpunimit dhe marrëdhënieve bilaterale ushtarake midis Republikës së Kosovës dhe Republikës Federale të Gjermanisë.