Komandanti i misionit KFOR të udhëhequr nga NATO, Gjeneral Major Özkan Ulutaš, ka pritur në takim Përfaqësuesin Special të Sekretarit të Përgjithshëm të OKB-së dhe Shefin e UNMIK-ut, Peter N. Due, në Selinë e KFOR-it në Kampin Film City në Prishtinë. Takimi u zhvillua më 8 janar 2026 dhe u përqendrua në situatën aktuale të sigurisë në Kosovë.
Gjatë bisedës u theksua bashkëpunimi i ngushtë ndërmjet KFOR-it dhe UNMIK-ut. Gjeneral Major Ulutaš rikonfirmoi përkushtimin e KFOR-it për vazhdimin e koordinimit ndërmjet dy misioneve, me qëllim ruajtjen e një mjedisi të sigurt dhe të qetë për të gjithë njerëzit në mbarë Kosovën.
KFOR-i vazhdon të zbatojë mandatin e tij, të bazuar në Rezolutën 1244 të Këshillit të Sigurimit të OKB-së të vitit 1999, për të kontribuar në një mjedis të sigurt për të gjithë banorët e Kosovës dhe për të garantuar lirinë e lëvizjes në çdo kohë dhe në mënyrë të paanshme. Misioni punon në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), në rolet e tyre përkatëse si reagues të sigurisë.