Komisioni Evropian konfirmoi të hënën se nuk ka marrë asnjë vendim formal për ngrirjen e mjeteve financiare nga Plani i Rritjes i Bashkimit Evropian për Serbinë.
Zëdhënësi i Komisionit, Markus Lammers, deklaroi: "Nuk ka asnjë vendim për t’i ngrirë fondet apo diçka të tillë".
Ai shtoi se Komisioni Evropian vlerëson vazhdimisht nëse përmbushen kushtet përkatëse për mbështetje sipas instrumenteve financiare të BE-së. Kjo është pjesë e zbatimit normal të këtyre instrumenteve dhe zbatohet gjatë gjithë procesit, duke përfshirë edhe Planin e Rritjes në fazën e çdo kërkese për pagesë.
Lammers përsëriti shqetësimet e institucioneve evropiane në lidhje me miratimin e ligjeve gjyqësore dhe theksoi se Serbia pritet ta zbatojë plotësisht mendimin e Komisionit të Venedikut mbi këtë legjislacion.
Komentet e tij vijnë pas deklaratës së komisionares për Zgjerim, Marta Kos, më 30 prill në Universitetin e Friburgut në Zvicër. Ajo tha se KE kishte pezulluar të gjitha pagesat nga Plani i Rritjes, sepse Serbia ka shënuar regres në fushën e drejtësisë dhe nuk do të marrë mbështetje financiare derisa ta përmirësojë.
Ligjet e diskutueshme, të njohura si "ligjet e Mërdiqit", u miratuan në janar të këtij viti dhe për BE-në përbëjnë një hap prapa në procesin e integrimit të Serbisë.
Marta Kos ka paralajmëruar më herët se këto ligje kufizojnë pavarësinë e gjyqësorit.
Më 24 prill, Komisioni i Venedikut, organ ekspertësh i Këshillit të Evropës, vlerësoi se ndryshimet në paketën e ligjeve për gjyqësorin në Serbi kanë hequr mbrojtjet ekzistuese të autonomisë së prokurorisë. Ai i dha Serbisë 9 rekomandime për eliminimin e mangësive.
Bashkimi Evropian kërkon nga Serbia zbatim të plotë të të gjitha rekomandimeve të Komisionit të Venedikut lidhur me ligjet për gjyqësorin dhe njëkohësisht pezullim të tyre.