Komisionarja evropiane për Zgjerim, Marta Kos, deklaroi në Bruksel më 11 maj se nuk ekziston vendim formal për ngrirjen e fondeve për Serbinë nga Plani i Rritjes, por Beogradi nuk ka marrë asnjë pagesë që nga miratimi i ligjeve për drejtësinë në janar.
"Asnjëherë nuk kam thënë se fondet janë ngrirë. Kjo është shumë e rëndësishme", u tha Kos gazetarëve. Ajo shpjegoi se Komisioni Evropian verifikon vazhdueshëm përmbushjen e kritereve nga vendet përfituese dhe konfirmoi mungesën e pagesave pas ligjeve të diskutueshme.
Më 30 prill, Kos kishte thënë se Komisioni kishte ndaluar pagesat nga Plani i Rritjes, sepse Serbia kishte shënuar prapakthim në drejtësi dhe, derisa ta korrigjojë, nuk do të marrë mbështetje financiare nga BE-ja.
Ligjet e Mërdiqit, të miratuara në janar, kufizojnë pavarësinë e gjyqësorit sipas Bashkimit Evropian dhe paraqesin hap prapa në integrimin e Serbisë drejt BE-së. Kos i ka paralajmëruar pasojat e tyre më herët.
Nëse Komisioni konstaton përmbushjen e kritereve, Serbia do të marrë fondet e ndara. "Statusi i vendit kandidat sjell obligime reciproke dhe ne presim përparim, jo prapakthim", tha ajo.
Nga Plani i Rritjes, për Serbinë janë parashikuar 1.588 miliardë euro për 2024-2027, përfshirë grante dhe kredi për reforma. Mjetet paguhen dy herë në vit, sipas përparimit.