Komisioni Evropian u ka paraqitur shteteve anëtare të Bashkimit Evropian një rekomandim me shkrim, përmes të cilit konstatohet se Serbia është teknikisht e gatshme për hapjen e klasterit 3 në negociatat e anëtarësimit. Kjo çështje është përfshirë në agjendën zyrtare të takimit të ambasadorëve të BE-së, i cili është planifikuar të mbahet më 8 korrik.
Dokumenti thekson progresin e bërë nga autoritetet serbe në disa fusha kyçe, duke përfshirë ndryshimet në ligjet për gjyqësorin të miratuara në fund të qershorit, emërimin e anëtarëve të Organit Rregullator për Mediat Elektronike (REM) dhe reformën e kornizës zgjedhore në përputhje me rekomandimet e ODIHR-it.
Sa i përket politikës së jashtme, raporti vë në dukje se shkalla e harmonizimit të Serbisë me masat kufizuese të BE-së është 60 për qind. Megjithatë, Komisioni thekson se Serbia ende nuk është harmonizuar me sanksionet ndaj Rusisë, Bjellorusisë dhe Kinës. Në fushën e vizave, Serbia ka vendosur regjim për shtetasit e katër vendeve të treta, ndërsa kërkohet përafrimi për edhe 12 vende të tjera për të arritur harmonizimin e plotë.
Ky rekomandim bazohet në vlerësimin teknik të vitit 2021, i cili konfirmoi gatishmërinë e Serbisë për këtë proces. Komisioni synon të sigurojë mbështetjen unanime të shteteve anëtare për avancimin e negociatave gjatë muajit korrik.