Komisioni Evropian ka shprehur shqetësim për faktin se Serbia po u ofron shtetësi shtetasve rusë, duke u mundësuar atyre hyrjen pa viza në vendet e Bashkimit Evropian. Sipas institucioneve evropiane, ky fenomen përbën një sfidë për sigurinë e bllokut, pasi mes personave që pajisen me pasaporta serbe mund të ketë individë që janë nën sanksionet e BE-së ose që konsiderohen kërcënim për sigurinë.
Zëdhënësi i Komisionit Evropian, Guillaume Mercier, theksoi se kjo çështje është ngritur vazhdimisht në raportet e progresit për Serbinë. BE u ka bërë thirrje autoriteteve serbe të përshtatin politikën e tyre të vizave me ato të bllokut evropian dhe të ndërpresin praktikat e procedurave të pajisjes me shtetësi.
Prej fillimit të luftës në Ukrainë, Serbia është kthyer në një vend me përqendrim të lartë të qytetarëve rusë. Zyrtarët evropianë bënë me dije se janë duke zhvilluar dialog të vazhdueshëm me palën serbe për të gjetur një zgjidhje për këtë problematikë. Përveç dhënies së shtetësisë, Serbia mbetet subjekt i kritikave nga Brukseli për shkak të refuzimit për t'u rreshtuar krah sanksioneve evropiane ndaj Rusisë.