Pas mbylljes së qumështores Vita si rrjedhojë e një aksioni të zhvilluar nga disa inspektorate, Komuna e Istogut ka shprehur shqetësim të thellë për pasojat ekonomike që ky vendim sjell në territorin e saj. Në një njoftim zyrtar, komuna e cilëson këtë veprim si një goditje të rëndë për zinxhirin e prodhimit të qumështit, që përbën një ndër shtyllat kryesore të ekonomisë lokale.
Kryetari i Komunës së Istogut, Ilir Ferati, ka kërkuar rihapjen e menjëhershme të fabrikës, duke nënvizuar se ndërprerja e veprimtarisë po krijon pasiguri për qindra punëtorë dhe fermerët që e kanë këtë kompani si partnerin e tyre kryesor për grumbullimin e qumështit. Sipas komunës, ndërprerja e punës në këtë ndërmarrje sjell pasoja të menjëhershme financiare për familjet që jetojnë nga ky sektor.
Në qëndrimin e tij, kryetari Ferati ka bërë thirrje që çdo çështje lidhur me funksionimin e qumështores të trajtohet në rrugë institucionale dhe me transparencë të plotë, në mënyrë që të mos dëmtohet interesi i prodhuesve vendorë. Komuna e Istogut është zotuar se do të vazhdojë të mbështesë prodhimin vendor dhe punëtorët e prekur nga kjo situatë.