Komuna e Prishtinës nënshkruan marrëveshje me Ndërmarrjen Rajonale Pastrimi

Përparim Rama, kryetari i Komunës së Prishtinës, bëri të ditur se Ndërmarrja Komunale Pastrimi (KRM Pastrimi) po përballet me vështirësi në menaxhimin e grumbullimit të mbeturinave në kryeqytet, për shkak të pamundësive teknike dhe mungesës së kapaciteteve operative të plota, përfshirë mungesën e stafit.

Pas kërkesës së KRM Pastrimi për mbështetje institucionale, Komuna e Prishtinës ka reaguar menjëherë duke nënshkruar një marrëveshje mirëkuptimi me Ndërmarrjen Rajonale Pastrimi. Në këtë marrëveshje janë përcaktuar ndihmat konkrete dhe parimet e bashkëpunimit ndërinstitucional.

Në bazë të marrëveshjes, më 29 janar 2026 ka nisur angazhimi i Ndërmarrjes Rajonale Pastrimi në terren, me fokus në grumbullimin dhe largimin e mbetjeve inerte ndërtimore, si dhe të mbetjeve vëllimore nga deponitë ilegale në territorin e Prishtinës. Ky bashkëpunim synon rritjen e kapaciteteve operative dhe ofrimin e shërbimeve më të shpejta për përmirësimin e pastërtisë dhe cilësisë së jetës së qytetarëve.

Sipas nenit 4 të marrëveshjes, KRM Pastrimi do të ofrojë resurset e veta për kontrollin, monitorimin dhe mbikëqyrjen e operatorëve ekonomikë të angazhuar nga Komuna, duke raportuar drejtpërdrejtë tek ajo.

Ky veprim vjen në kontekstin e ankesave të qytetarëve për mosgrumbullim të mbeturinave dhe pas lidhjes së një kontrate me negocim me një kompani private për vlerën prej 950 mijë euro. Kjo kontratë është denoncuar në polici dhe Organin Shqyrtues të Prokurimit Publik nga Lëvizja Vetëvendosje, e cila pretendon se bie ndesh me rregulloren për menaxhimin e mbeturinave, që e cakton KRM Pastrimi si përgjegjëse kryesore. Bashkëpunimi pritet të vazhdojë për adresimin e sfidave në menaxhimin e mbeturinave.