Kryetari i Prishtinës, Përparim Rama, ka bërë të ditur se administrata lokale po vazhdon aksionin për lirimin e banesave komunale, të cilat për vite me radhë janë shfrytëzuar në mënyrë të paligjshme.
Në një njoftim zyrtar, Rama ka theksuar se këto prona janë përdorur pa kontrata dhe pa bazë ligjore. Ai ka shprehur qëndrimin se prona publike nuk mund të uzurpohet e as të trajtohet si pronë private, duke shtuar se detyrimi i institucioneve është mbrojtja, kthimi në funksion të ligjit dhe menaxhimi me përgjegjësi e transparencë.
Sipas kreut të kryeqytetit, ky aksion i udhëhequr nga Drejtoria e Pronës do të vazhdojë pa kompromis ndaj çdo uzurpimi të pronës komunale, me synimin për të rikthyer administrimin e rregullt të këtyre hapësirave.