Zëvendëskryeministri dhe ministri në detyrë i Punëve të Jashtme dhe Diasporës, Glauk Konjufca, ka zhvilluar një takim me Christian Wiermer, sekretar i Shtetit për Çështje Evropiane dhe Ndërkombëtare të landit federal Nordrhein-Westfalen të Gjermanisë. Në qendër të bisedimeve ishin raportet ndërmjet Republikës së Kosovës dhe landit gjerman, avancimi i perspektivës evropiane të vendit, si dhe roli i diasporës.
Sipas njoftimit zyrtar të Ministrisë së Punëve të Jashtme dhe Diasporës, gjatë takimit u vlerësua rëndësia e bashkatdhetarëve kosovarë që jetojnë në Nordrhein-Westfalen. Ky land përbën një nga zonat me komunitetin më të madh të qytetarëve nga Kosova në Gjermani. Diaspora u cilësua si një urë lidhëse strategjike, e cila ndikon drejtpërdrejt në forcimin e bashkëpunimit dhe marrëdhënieve dypalëshe.
Palët shprehën zotimin për të vijuar bashkëpunimin e mëtejshëm dhe për të thelluar lidhjet mes Kosovës dhe landit Nordrhein-Westfalen. Ky angazhim shihet si një hap i rëndësishëm në funksion të rrugës evropiane të vendit, ku kontributi i diasporës vlerësohet si një element kyç për zhvillimin e bashkëpunimit ndërmjet palëve.