Ministri i Punëve të Jashtme i Kosovës, Glauk Konjufca, ndodhet në Hagë në ditën kur në Kosovë është mbajtur një marsh në mbështetje të ish-krerëve të Ushtrisë Çlirimtare të Kosovës (UÇK).
Ai foli para mediave në Hagë dhe shprehu bindjen se aktakuza kundër ish-krerëve të UÇK-së do të rrëzohet dhe ata do të lirohen. Konjufca pyeti se si është e mundur që UÇK-ja, e akuzuar si ndërmarrje e përbashkët kriminale, të ketë qenë aleate e NATO-së në terren.
Sipas tij, është qesharake të besohet se “UÇK-ja i ka mashtruar shtetet me shërbimet më të forta në botë”. Ai theksoi se, nëse në zemrën e UÇK-së do të kishte pasur një ndërmarrje të përbashkët kriminale, nuk do të kishte ndodhur intervencioni i NATO-së. “Nëse kishte me qenë Bashkimi Evropian, po të kishim qenë me këta skenarë të këqij, nuk do të kishin ndodhur intervenimet e NATO-së. Aeroplanët janë ngritur sepse nuk kanë qenë skenarë të këqij. Nëse në zemrën e UÇK-së ka pasur ndërmarrje të përbashkët kriminale, si ka mundur me shërbyer UÇK-ja si aleate e NATO-së në terren?”, deklaroi ai.