Mungesa e një magazine doganore ka krijuar probleme në mbajtjen e mallrave të bllokuara në portin detar të Durrësit. Rreth 100 kg mallra, kryesisht atlete, pantallona dhe kufje, të bllokuara nga Dogana e Durrësit për verifikim origjinaliteti, u vendosën në fillim të muajit prill në një kontenier bosh, në pritje të përgjigjes nga Drejtoria e Përgjithshme e Doganave.
Më 9 prill, dogana konstaton mungesën e kontenierit dhe nis verifikimet. Nga hetimet paraprake rezulton se agjencia e transportit detar e kishte nisur gabimisht drejt Pires të Greqisë, duke e konsideruar bosh. Pas konstatimit, kontenieri u kthye me anije në Durrës.
Kontenieri pritet të hapet më 24 prill në prani të Prokurorisë së Durrësit dhe Hetimit Doganor. Mallrat janë të inventarizuara dhe do të nënshtrohen verifikimit përkatës.