Drejtoria e Përgjithshme e Doganave ka reaguar për publikimet në media lidhur me veprimet e strukturave doganore në Portin e Durrësit. Në bashkëpunim me Grupin e Antikontrabandës, është ushtruar kontroll mbi një kontenier të deklaruar me regjim tranziti, ku u konstatuan mallra të dyshuara si cenuese të të drejtave të pronësisë intelektuale.
Sipas procedurave ligjore, u vendos bllokimi i mallrave deri në vendimin përfundimtar. U mundësua një kontenier bosh për depozitim, i cili u plumbos dhe u vendos në Zonën e Monitorimit. Më pas, ky kontenier u përdor për dy bllokime të tjera me mallra të ngjashme, sipas procesverbaleve.
Më 9 prill 2026, pas kontrollit të një deklarate tjetër tranziti me mallra të dyshuara, këto u depozituan në të njëjtin kontenier. Gjatë kqyrjes, rezultoi se kontenieri nuk ndodhej në zonën e monitorimit. Autoriteti doganor kontaktoi Autoritetin Portual, i cili konfirmoi se kontenieri ishte imbarkuar më 2 prill në një anije si bosh, drejt portit të Pireut në Greqi.
Përfaqësuesi i agjencisë detare konfirmoi imbarkimin. Kontenieri është kthyer në Portin e Durrësit, ku verifikimi paraprak tregoi se plumbosja nuk ka ndryshime. Ai do të hapet nga strukturat e hetimit doganor dhe Prokuroria e Durrësit.
Dogana ka filluar hetim procedural dhe do të vlerësojë përgjegjësinë disiplinore të punonjësve krahas procedurës penale.