Shërbimet doganore në Portin e Durrësit, në bashkëpunim me Policinë Kufitare, kanë ushtruar kontrolle intensive për parandalimin dhe goditjen e shkeljeve doganore. Mbrëmjen e së hënës, gjatë kontrolleve në dalje të territorit të Republikës së Shqipërisë, autoritetet kanë konstatuar dhe sekuestruar një shumë prej 19,000 eurosh të padeklaruara.
Ngjarja ka ndodhur përpara imbarkimit në linjën detare Durrës-Bari. Rasti është referuar pranë organeve kompetente për veprime të mëtejshme ligjore.
Sipas legjislacionit në fuqi, çdo person që hyn ose del nga territori i Shqipërisë është i detyruar të deklarojë pranë autoriteteve doganore shumat e parave të gatshme që janë të barabarta ose tejkalojnë vlerën prej 10,000 eurosh. Autoritetet bënë të ditur se kontrollet në terren do të vijojnë pa ndërprerje, me synim garantimin e zbatimit të plotë të ligjit dhe luftën ndaj tentativave abuzive në kufi.
Përditësime
Policia e Shtetit sqaroi se sekuestrimi i 19 mijë eurove të padeklaruara në Portin e Durrësit ka ndodhur mbrëmjen e së martës, duke korrigjuar njoftimin e mëparshëm që e vendoste ngjarjen gabimisht ditën e hënë.