Dega e Doganës Durrës, në bashkëpunim me Drejtorinë Vendore të Kufirit dhe Migracionit të Policisë së Shtetit, zhvilloi më 28 mars një operacion të përbashkët kontrolli në zonën e Porto Romano.
Operacioni kishte si fokus parandalimin dhe evidentimin e paligjshmërive në fushën doganore. Kontrollet u kryen mbi bazën e analizës së riskut dhe informacioneve operative, duke u përqendruar në verifikime të detajuara ndaj subjekteve dhe mjeteve të dyshuara që hyjnë në territorin shqiptar.
Agjentët e Doganës dhe efektivët e Policisë Kufitare ushtruan kontrolle të imtësishme mbi automjetet e importuara në portin e ri. Për këtë qëllim, ata përdorën edhe qen të trajnuar posaçërisht për zbulimin e lëndëve të paligjshme.
Drejtoria e Përgjithshme e Doganave dhe Policia e Shtetit bëjnë me dije se mbeten të angazhuara për forcimin e kontrolleve në pikat hyrëse të vendit. Kjo me synim garantimin e sigurisë dhe transparencës në qarkullimin e mallrave dhe mjeteve.