Gjatë kontrolleve të ushtruara në Portin e Durrësit, autoritetet doganore në bashkëpunim me Policinë e Shtetit kanë bllokuar disa sende të dyshuara, pas mbërritjes së tragetit nga Ankona e Italisë.
Zbulimet u realizuan në tre raste të veçanta:
• Në një automjet të mbërritur me tragetin e linjës Ankona–Durrës, u gjet një valixhe që përmbante një pajisje elektronike për detektimin e metaleve të çmuara, së bashku me aksesorët përkatës të montimit.
• Gjatë kontrollit fizik të një shtetasi që udhëtonte me një tjetër automjet të ardhur nga Italia, u gjetën katër paketime transparente që përmbanin gurë të ngjashëm me diamantet.
• Në një automjet të tretë, u zbulua një sasi e dyshuar lënde narkotike, kokainë, e cila ishte fshehur brenda një veshjeje në kabinën e drejtuesit të mjetit.
Sipas njoftimit zyrtar, materialet e sekuestruara janë marrë në administrim nga autoritetet kompetente. Aktualisht, po kryhen ekspertizat e nevojshme për të përcaktuar natyrën e saktë të lëndëve narkotike, vlerën e gurëve dhe për të dokumentuar rrethanat e ngjarjeve.