Gjatë një operacioni të përbashkët në Portin e Durrësit, Administrata Doganore dhe Policia Kufitare kanë identifikuar dhe bllokuar një shumë prej 50 mijë eurosh të padeklaruara. Paratë u zbuluan gjatë kontrollit në vijën e dytë të një mjeti të rëndë, të llojit bizarkë, pasi drejtuesi i tij nuk kishte përmbushur detyrimin ligjor për deklarimin e shumave monetare.
Pas konstatimit të shkeljes, autoritetet kanë sekuestruar paratë, kanë bllokuar mjetin dhe kanë ndaluar drejtuesin e tij. Materialet procedurale janë dërguar për hetime të mëtejshme pranë Drejtorisë Vendore për Kufirin dhe Migracionin në Durrës.
Administrata Doganore theksoi se kontrollet e intensifikuara në të gjitha pikat kufitare do të vazhdojnë, me qëllim parandalimin e shkeljeve doganore dhe garantimin e zbatimit të legjislacionit në fuqi. Ky aksion vjen si pjesë e bashkëpunimit ndërinstitucional për luftën kundër aktiviteteve të paligjshme dhe forcimin e sigurisë kufitare.