Një ngjarje tragjike ka ndodhur pasditen e së shtunës në qytetin e Korçës, ku një 62-vjeçar ka humbur jetën si pasojë e një rrëzimi aksidental. Viktima, i identifikuar me inicialet V.K. dhe banues në Bilisht, ndodhej për vizitë në banesën e motrës së tij kur ndodhi ngjarja.
Sipas të dhënave paraprake, 62-vjeçari dyshohet se ka rrëshqitur në tualetin e banesës, duke pësuar dëmtime të rënda në kokë. Motra e tij ka njoftuar menjëherë shërbimin e urgjencës, i cili e ka transportuar personin për ndihmë mjekësore në Spitalin Rajonal të Korçës.
Megjithatë, përkundër ndërhyrjes së personelit mjekësor, viktima nuk ka mundur t'u mbijetojë plagëve të marra. Shërbimet e policisë kanë mbërritur në vendngjarje dhe kanë nisur veprimet procedurale për zbardhjen e rrethanave të aksidentit. Trupi i viktimës do t'i nënshtrohet ekspertizës mjeko-ligjore, e cila do të përcaktojë zyrtarisht shkakun e vdekjes.