Një aksident me pasojë vdekjen e një 62-vjeçari është regjistruar mesditën e së dielës, më 31 maj 2026, në aksin rrugor Korçë-Bilisht. Ngjarja ka ndodhur në afërsi të kryqëzimit të fshatit Tren, në bashkinë Devoll.
Sipas njoftimit zyrtar të Policisë së Korçës, automjeti me drejtues shtetasin F. P., 47 vjeç, banues në fshatin Sul të Devollit, ka përplasur këmbësorin L. Sh., rreth 62 vjeç. Aksidenti ka ndodhur në momentin kur viktima sapo kishte zbritur nga një automjet tjetër.
I dëmtuari është transportuar menjëherë drejt spitalit për të marrë ndihmë mjekësore, por për shkak të plagëve të rënda të marra, ka ndërruar jetë.
Pas hetimeve paraprake, specialistët e Sektorit të Qarkullimit Rrugor kanë arrestuar në flagrancë shtetasin F. P., i cili akuzohet për veprën penale "Shkelja e rregullave të qarkullimit rrugor", me pasojë vdekjen. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë për veprime të mëtejshme.