Kosova ndalon importin e deleve dhe dhive nga Shqipëria për PPR

Kosova ka ndaluar të mërkurën, më 15 prill, importin e deleve dhe dhive nga i gjithë territori i Shqipërisë. Vendimi është marrë nga Ministria e Bujqësisë, Pylltarisë dhe Zhvillimit Rural në koordinim me Agjencinë e Ushqimit dhe Veterinarisë (AUV), pas konfirmimit të rasteve të sëmundjes PPR (Peste des Petits Ruminants) në Qarkun e Dibrës.

Ndalesa është përkohshme dhe do të vazhdojë deri në një vendim tjetër, në varësi të zhvillimeve epidemiologjike. AUV ka udhëzuar komunat kufitare me Shqipërinë që, përmes drejtorive të bujqësisë, të vendosin masa strikte për kufizimin e lëvizjes së bagëtive të imëta në kullotat kufitare. Fermerët duhet të mbajnë nën mbikëqyrje tufat e tyre dhe të shmangin çdo kontakt me kopetë nga ana shqiptare.

Autoritetet kufitare do të shtojnë kontrollet në të gjitha pikat kufitare dhe zonat përgjatë kufirit. AUV u bën thirrje fermerëve të rrisin masat e biosigurisë dhe të ndërmarrin këto veprime:
• Të shmangin lëvizjet e panevojshme të kafshëve nga një zonë në tjetrën;
• Të raportojnë menjëherë te veterinerët çdo shenjë të dyshimtë, si ethe, rrjedhje nga hunda, dobësi ose diarre;
• Të kufizojnë kontaktin e tufave me kafshë të tjera, veçanërisht në zonat kufitare;
• Të mos blejnë kafshë nga ferma të tjera pa verifikuar statusin shëndetësor të tyre;
• Të respektojnë udhëzimet zyrtare dhe të shtojnë masat e biosigurisë në ferma.

PPR është një sëmundje virale shumë ngjitëse që prek delet dhe dhitë, duke shkaktuar humbje të mëdha në blegtori. Ajo përhapet përmes kontaktit të drejtpërdrejtë, sekrecioneve dhe jashtëqitjeve. Simptomat përfshijnë temperaturë të lartë, rrjedhje nga hunda, inflamacion të syve, ulje të oreksit dhe diarre, ndërsa mund të çojë në ngordhje. Autoritetet theksojnë se sëmundja nuk paraqet rrezik për shëndetin e njeriut.