Pas analizave diagnostike të realizuara në Laboratorin e Ushqimit dhe Veterinarisë, Agjencia e Ushqimit dhe Veterinarisë (AUV) ka konfirmuar praninë e sëmundjes infektive Lija e Deleve/Dhive (Sheep Pox/Goat Pox) në një fermë në fshatin Delloc të komunës së Suharekës. Ekipet e AUV-së, në bashkëpunim me veterinerët privatë, kanë ndërmarrë veprime të menjëhershme për kontrollin e situatës.
Bazuar në Ligjin Nr. 2004/21 për Veterinarinë, Ministria e Bujqësisë, Pylltarisë dhe Zhvillimit Rural, përmes AUV-së, ka vendosur masa të përgjithshme për gjithë territorin e Kosovës:
- Ndalohet lëvizja, tregtimi dhe shitblerja e deleve dhe dhive.
- Fermat ku është identifikuar sëmundja janë vënë në karantinë të plotë, duke ndaluar çdo hyrje apo dalje.
- Fermerët obligohen të njoftojnë veterinerin për çdo ndryshim të gjendjes shëndetësore të kafshëve dhe të zbatojnë protokollet e biosigurisë.
- Komunat kanë detyrimin të përcaktojnë lokacionet për groposjen e kafshëve të ngordhura.
Si përjashtim nga kufizimet, autoritetet kanë njoftuar se lejohet lëvizja e kafshëve nga fermat e konfirmuara si të lira nga kjo sëmundje drejt thertoreve të licencuara. AUV vazhdon hulumtimin epidemiologjik, marrjen e mostrave dhe testimet laboratorike për të vlerësuar ecurinë e përhapjes.