Në fshatin Lubishtë të komunës Vitisë, është konfirmuar prania e tuberkulozit dhe brucelozës te lopët. Rasti i parë u identifikua më 3 mars 2026 në fermën e Xhevxhet Ferizit.
Fermeri Xhevxhet Ferizi deklaroi se 12 krerë lopë do të asgjësohen për shkak të këtyre sëmundjeve infektive, ndërsa disa të tjera kanë ngordhur. Ai shpjegoi se dyshimet fillestare lindën nga abortimi i viçave, ndërsa diagnoza u konfirmua me ndihmën e veterinerit. Ferizi posedon rreth 60 krerë lopë, por përballet me vështirësi për kujdesin dhe ushqimin e tyre, pasi ushqimi për kafshë është shtrenjtuar.
Bashkëshortja e tij, Nerxhivane Ferizi, theksoi se ferma është burimi kryesor i të ardhurave familjare dhe se dëmet janë të mëdha. Familja shpreson mbështetje nga institucionet për të kaluar krizën.
Sadik Sadikheta nga Agjencia e Ushqimit dhe Veterinës konfirmoi se në komunën Vitisë janë identifikuar raste të ngjashme në disa ferma me lopë qumështore. Ai sqaroi se asgjësimi i kafshëve të infektuara synon çrrënjosjen e sëmundjes dhe parandalimin e përhapjes. Autoriteti ka dhënë këshilla fermerëve dhe premton kompensim për dëmet. Sadikheta u bëri thirrje fermerëve të mos krijojnë panik dhe të zbatojnë dispozitat ligjore.