Ministria e Bujqësisë, Pylltarisë dhe Zhvillimit Rural dhe Agjencia e Ushqimit dhe Veterinës (AUV) njoftuan opinionin publik për menaxhimin e rasteve të sëmundjeve infektive te gjedhët, konkretisht Brucelozës dhe Tuberkulozit. Rasti i parë u konfirmua më 3 mars 2026, te një fermer në fshatin Lubishtë të Komunës së Vitisë.
Në përputhje me legjislacionin në fuqi dhe udhëzimin administrativ, AUV po vepron brenda afateve ligjore për marrjen e masave, përfshirë asgjësimin e kafshëve të infektuara brenda 30 ditësh nga konfirmimi.
Të gjitha veprimet institucionale zhvillohen në përputhje me këtë afat, duke garantuar menaxhim të kontrolluar dhe të sigurt. Ministria dhe AUV theksojnë përkushtimin për zbatimin e masave ligjore kundër këtyre sëmundjeve dhe ruajtjen e shëndetit publik si dhe sigurisë ushqimore.
Autoritetet u bënë thirrje fermerëve dhe qytetarëve të bashkëpunojnë me institucionet kompetente dhe të raportojnë çdo dyshim për raste të ngjashme.