Me nisjen e nëntorit, Qeveria e Kosovës përmbylli fushatën e Tetorit Rozë, kushtuar ndërgjegjësimit për kancerin e gjirit. Në tryezën “Përtej Tetorit Rozë – Së bashku për shëndetin”, kryeministri Albin Kurti dhe ministri i Shëndetësisë Arben Vitia theksuan rëndësinë e kontrolleve të rregullta dhe të zbulimit të hershëm.
Kurti tha se ndërgjegjësimi nuk duhet të kufizohet në muajin tetor, por të bëhet pjesë e kujdesit të vazhdueshëm për shëndetin publik. Ai u bëri thirrje grave të mos i shtyjnë kontrollet dhe tha se institucionet duhet të shkurtojnë distancën ndërmjet shqetësimit dhe kontrollit, diagnozës dhe trajtimit, si dhe gruas që kërkon ndihmë dhe institucionit që i përgjigjet.
Sipas Kurtit, mamografia ofrohet falas gjatë gjithë vitit. Gjatë tetorit, mamografi mobil udhëton nëpër qytetet e Kosovës për ta afruar shërbimin me gratë. Ai tha se në Onkologji janë përmirësuar kushtet dhe janë instaluar aparatura të teknologjisë së fundit. Rikonstruktimi i gjirit ofrohet falas dhe pa pritje.
Vitia bëri të ditur se është hartuar plani i veprimit për skriningun e kancerit të gjirit dhe se zbatimi i tij ka nisur. Sipas të dhënave të vitit të kaluar, 53,4 për qind e grave u diagnostikuan në stadet e para dhe të dyta të sëmundjes. Bazuar në informacionet e institucioneve shëndetësore, kjo përqindje pritet të jetë edhe më e lartë gjatë vitit që po përmbyllet. Synimi i ministrisë është rritja e mëtejshme e saj dhe mundësimi i diagnostikimit në të gjithë territorin e Kosovës.
Vitia tha se zbulimi i hershëm është mënyra më e mirë, më pak traumatike dhe më e lirë për mbrojtjen nga sëmundja. Ai theksoi rëndësinë e mundësive për diagnostikim dhe të pajisjeve për pacientet në të gjithë vendin, si dhe të vetëkontrollit e paraqitjes së hershme te mjeku.
Ministri falënderoi mediat për përcjelljen e aktiviteteve dhe përmendi bashkëpunimin me përfaqësuesit komunalë, organizatat dhe ndërmarrjet publike e private. Ndër të përmendurit ishin Bujar Gashi, drejtor i Drejtorisë së Shëndetësisë dhe Mirëqenies Sociale në Prishtinë, Albana Gashi, drejtoreshë e së njëjtës drejtori në Fushë Kosovë, dhe Shoqata Jeta Vita, e drejtuar nga Nafije Latifi.
Gjatë tetorit, kryetarja e Kuvendit të Kosovës, Albulena Haxhiu, kishte bërë thirrje për kujdes më të madh ndaj shëndetit të grave dhe për kryerjen e kontrolleve të rregullta mjekësore.