Një ngjarje tragjike ka ndodhur gjatë ditës së shtunë në Finlandë, ku një qytetar kosovar ka humbur jetën si pasojë e një aksidenti në komunikacion. Aksidenti është regjistruar në zonën Tuupakka të Vantaas, përgjatë rrugës unazore Kehä III.
Sipas informacioneve të bëra publike nga Policia e Itä-Uusimaas, përplasja midis një veture dhe një motoçiklete ndodhi gjatë një manovre për ndërrimin e korsisë. Si pasojë e goditjes, drejtuesi i motoçikletës ndërroi jetë në vendin e ngjarjes. Autoritetet e rendit, ekipet e shpëtimit dhe shërbimi mjekësor u njoftuan për rastin rreth orës 12:29.
Familjarët e viktimës kanë konfirmuar përmes rrjeteve sociale se bëhet fjalë për Mehmet Gashin, 54 vjeç. Policia finlandeze ka nisur hetimet për zbardhjen e plotë të rrethanave të ngjarjes. Aktualisht, shoferi i automjetit, i cili është përfshirë në përplasje, dyshohet për tri vepra penale:
• Drejtim të mjetit nën ndikimin e alkoolit;
• Rrezikim të rëndë të sigurisë në komunikacion;
• Shkaktim të vdekjes nga pakujdesia.
Hetimet nga ana e autoriteteve përkatëse mbeten në vazhdim për të përcaktuar detajet teknike të këtij aksidenti fatal.