Zëvendësministri në detyrë i Punëve të Jashtme dhe Diasporës, Kreshnik Ahmeti, ka zhvilluar një vizitë zyrtare në Vjenë, ku është takuar me deputetët austriakë, anëtarë të Grupit Parlamentar për marrëdhëniet dypalëshe me Kosovën.
Diskutimet u fokusuan te marrëdhëniet e ngushta ndërmjet Kosovës dhe Austrisë, si dhe te mundësitë për zgjerimin e bashkëpunimit të mëtejshëm. Pjesëmarrësit shqyrtuan gjithashtu zhvillimet aktuale politike dhe çështjet e sigurisë në nivel rajonal dhe evropian.
Sipas njoftimit zyrtar nga Ministria e Punëve të Jashtme dhe Diasporës (MPJD), në takim është theksuar roli i diplomacisë parlamentare si një mekanizëm kyç për fuqizimin e lidhjeve mes dy vendeve. Palët shprehën gatishmërinë për të intensifikuar kontaktet dhe për të vendosur një bashkëpunim më të rregullt midis Kuvendit të Republikës së Kosovës dhe Parlamentit të Austrisë.
Në përfundim të takimit, zëvendësministri Ahmeti falënderoi deputetët austriakë për mbështetjen e vazhdueshme ndaj Kosovës, duke nënvizuar rëndësinë e kësaj ndihme për përparimin e agjendës evropiane dhe forcimin e pozicionit ndërkombëtar të Republikës së Kosovës.