Instituti GAP dhe Instituti Kosovar për Qeverisje Lokale (KLGI) kanë kërkuar rishikimin e "Draft Ndryshimit dhe Plotësimit të Rregullores për Tarifa, Ngarkesa dhe Gjoba Komunale" të Komunës së Prishtinës, e cila aktualisht ndodhet në fazën e konsultimit publik.
Sipas këtyre instituteve, disa dispozita rrezikojnë të cenojnë parimet e barazisë, proporcionalitetit dhe mosdiskriminimit ndaj qytetarëve dhe subjekteve ekonomike. Një prej pikave kryesore të kontestuara është vendosja e tarifave për veprimtari ekonomike pa një metodologji të qartë, si dhe propozimi për një taksë prej 10 euro për hyrjen në territorin e kryeqytetit për automjetet e regjistruara jashtë Prishtinës.
Organizatat rikujtojnë se Prishtina përfiton çdo vit rreth 20 milionë euro si grant shtesë nga buxheti i shtetit për shkak të statusit të saj si kryeqytet, mjete këto që synojnë adresimin e ngarkesës administrative dhe funksionale të qytetit.
Nga ana tjetër, kryetari i Prishtinës, Përparim Rama, ka sqaruar se po shqyrtohet mundësia që tarifa për veturat që hyjnë në qendër të jetë 1 deri në 2 euro, ndërsa për kamionët tarifa e propozuar mbetet 10 euro. Rama deklaroi se këto tarifa mund të mos jenë të nevojshme në rast se qeveria zhbllokon fondet e Bankës Evropiane për Rindërtim dhe Zhvillim (BERZH), të cilat janë dedikuar për ndërtimin e unazës së qytetit.