Kroacia ka ndërmarrë një hap zyrtar për kthimin e pasurive ushtarake të trashëguara nga ish-Jugosllavia, të cilat sipas Zagrebit arrijnë një vlerë prej mbi 2.4 miliardë euro. Ministri i Jashtëm kroat, Gordan Grliq Radman, deklaroi se anija “Jadran” është vetëm një pjesë e kërkesave të shtetit kroat, të cilat përfshijnë gjithashtu nëndetëse, mjete të ndryshme lundruese dhe një spital ushtarak. Sipas autoriteteve kroate, ekzistojnë dokumente dhe harta interaktive që dëshmojnë zhvendosjen e 207 mjeteve lundruese nga Kroacia drejt Malit të Zi gjatë periudhës 1990-1991.
Kjo çështje është bërë pjesë e diskutimeve dypalëshe në kuadër të negociatave për anëtarësimin e Malit të Zi në Bashkimin Evropian. Ministri kroat konfirmoi se Zagrebi do të kërkojë që kthimi i pronave të konfiskuara dhe pasurive ushtarake të trajtohet brenda kapitullit 23 të negociatave. Deklaratat u bënë gjatë takimit të ministrave të Jashtëm të Procesit të Berlinit në Przhno, ku Gordan Grliq Radman mori pjesë edhe në nderimet për të burgosurit kroatë në ish-kampin e Morinjit.
Nga ana tjetër, ministri i Jashtëm i Malit të Zi, Ervin Ibrahimoviq, deklaroi se vendi i tij mbetet i përkushtuar për të ndërtuar një shoqëri të bazuar në drejtësi dhe në përballjen me të kaluarën. Burime të ndryshme theksojnë se moszgjidhja e këtyre çështjeve dypalëshe ka ndikuar në bllokimin e disa kapitujve të negociatave me Podgoricën, përfshirë atë të transportit (Kapitulli 14), ndërsa qëndrimi zyrtar i Bashkimit Evropian mbetet se këto mosmarrëveshje duhet të zgjidhen nëpërmjet dialogut para anëtarësimit.