Ekipet e terrenit të Kompanisë Rajonale të Ujësjellësit "Prishtina" kanë ndërmarrë një aksion në lagjen Hajvali, ku brenda një harku kohor prej dy orësh janë konstatuar 6 lidhje ilegale të ujit. Të gjitha ndërhyrjet në rrjet janë shkyçur menjëherë nga ekipet teknike.
Në njoftimin zyrtar, KRU "Prishtina" bën të ditur se për këto raste janë duke u përgatitur dokumentacionet për t'u proceduar në Prokurori. Kompania ka theksuar se këto veprime përbëjnë vjedhje të ujit dhe dëmtojnë funksionimin e sistemit.
Sipas kompanisë, këto ndërhyrje shkaktojnë:
• Ulje të presionit të ujit në rrjet;
• Dëmtim të infrastrukturës;
• Rrezikim të furnizimit të rregullt për konsumatorët që kryejnë pagesat.
KRU "Prishtina" ka paralajmëruar se aksionet e tilla do të vazhdojnë pa ndërprerje në të gjitha zonat që mbulohen nga shërbimet e saj. Çdo lidhje ilegale do të shkyçet dhe do të trajtohet në përputhje me procedurat ligjore në fuqi.