Kompania Rajonale e Ujësjellësit KRU Prishtina ka njoftuar publikun mbi zbulimin e tri lidhjeve ilegale në rrjetin e ujësjellësit, gjatë aksioneve të zhvilluara në zonën e Hajvalisë.
Sipas njoftimit zyrtar, ndërhyrjet e kësaj natyre shkaktojnë dëme në infrastrukturën e ujësjellësit, rrezikojnë funksionimin normal të rrjetit dhe cenojnë drejtpërdrejt të drejtat e konsumatorëve të cilët janë të rregullt në përmbushjen e obligimeve financiare ndaj ndërmarrjes.
Në reagimin e saj, KRU Prishtina ka theksuar se këto raste nuk janë të izoluara, duke i cilësuar ato si një problem serioz që ndikon negativisht në rrjetin e përbashkët dhe sjell pasoja për gjithë qytetarët. Kompania ka paralajmëruar se abuzimet nuk do të tolerohen dhe se ekipet e saj do të vijojnë kontrollet në terren gjatë periudhës së ardhshme, me qëllim identifikimin dhe parandalimin e ndërhyrjeve të tjera të paligjshme.
Në fund, KRU Prishtina u ka bërë thirrje qytetarëve që të respektojnë ligjin dhe të shmangin çdo lloj ndërhyrjeje të paautorizuar në infrastrukturën e ujësjellësit.