Kryetari i Bashkisë Kolonjë, Erion Isai, u paraqit këtë të premte në ambientet e Prokurorisë së Posaçme (SPAK). Sipas informacioneve të disponueshme, pritet që Isai-t t'i komunikohet zyrtarisht akuza për "shkelje të barazisë në tendera apo ankande publike", ndonëse nuk ka një konfirmim zyrtar nga ana e institucionit të akuzës.
Kjo nuk është hera e parë që kryebashkiaku thirret nga SPAK. Që nga viti 2024, ai është paraqitur disa herë për të dhënë shpjegime mbi procedurat e tenderave të ndjekura në institucionin që drejton. Në shtator të vitit 2025, SPAK i komunikoi atij akuzën si të dyshuar për shkelje të barazisë në tendera, në kuadër të një dosjeje që po hetohet prej kohësh.
Sipas hetimeve të prokurorisë, dyshohet se Isai, në bashkëpunim me punonjës të tjerë të Bashkisë Kolonjë, ka favorizuar operatorë ekonomikë të caktuar gjatë proceseve të prokurimit publik. Aktualisht, nuk ka një njoftim zyrtar të detajuar mbi zhvillimet e fundit apo hapat e mëtejshëm proceduralë në lidhje me këtë çështje.
Përditësime
Prokuroria e Posaçme (SPAK) ka zyrtarizuar marrjen si të pandehur të kryebashkiakut të Kolonjës, Erion Isai. Hetimet për tenderat e vitit 2023 kanë zbuluar parregullsi dhe dyshime për proceduara të paracaktuara, duke u fokusuar në dy pika kryesore: cilësinë e dobët të punimeve në rikonstruksionin e digës së Rezervuarit të Gjonçit dhe moszbatimin e projektit për ndërtimin e pritave malore.