Monika Kryemadhi doli nga ambientet e GJKKO-së pas seancës gjyqësore për dosjen Meta-Kryemadhi dhe deklaroi se ish-bashkëshorti i saj, Ilir Meta, është në top formë fizike.
Ajo mohoi pretendimet për rënie fizike të Metës gjatë qëndrimit në qeli, duke shpjeguar se në seancën e kaluar i kishin çuar një kostum më të madh, me masë 56 në vend të 52-53. "Unë jam si të verbërit vëlla, që me dorë e njoh Ilir Metën", tha ajo.
Gjatë seancës ndodhi një rrjedhje uji nga kondicioneri i sallës së re, për shkak të bllokimit të tubave, që pikonte mbi të pranishmit. Kryemadhi theksoi se nuk kishte tensione tjetër.
Sa i përket dosjes, ajo e cilësoi hetimin ndaj saj dhe Ilir Metës si politik dhe pa prova për fajësimin e tyre. "Gjyqi mes meje, Ilir Metës dhe drejtësisë së re është një gjyq politik. Ne, që kemi qenë shkaktarët e Reformës në Drejtësi, do paguajmë faturat tona, por s’kemi pse marrim me vete njerëz të pafajshëm", deklaroi ajo.
Kryemadhi vlerësoi si pozitive ndarjen e çështjes për tre të tjerë:
- Për nënën e saj, analiza financiare tregon burime të ligjshme të ardhurash gjatë gjithë jetës, të verifikuara më parë nga Inspektorati i Deklarimit të Pasurisë.
- Për shoqen Ema Çok, deklarata noteriale e vitit 2024 ishte normale, pasi në 2010 nuk ishin subjekt hetimi pasuror.
- Pretendimet për abuzime nga nëna e saj nuk qëndrojnë, pasi shpenzimet përfshijnë operacione shëndetësore për veten, vajzën dhe Metën, të gjitha të deklaruara.
Meta, si burrë shteti, nuk merret me çështjet e shtëpisë apo shpenzimet, as me marrëdhëniet me kushëririn Adrian Shatku.