Seanca gjyqësore e themelit për ish-presidentin Ilir Meta dhe Monika Kryemadhi u shty për në datën 24 shtator, ora 10:00. Vendimi u mor për shkak të mungesës së anëtares së trupit gjykues, Rudina Palloj, çka pamundësoi zhvillimin e procesit, pavarësisht se palët kërkuan zhvillimin e seancës pa praninë e avokatëve.
Gjatë seancës, avokatët e mbrojtjes ishin të pranishëm në sallë, por u ulën në vendet e publikut në shenjë boje ndaj vendimit të Dhomës Kombëtare të Avokatisë. Kryetari i trupit gjykues, Erjon Bani, paralajmëroi avokatin e Ilir Metës, Bujar Musta, se në rast se avokatët nuk paraqiten në seancën e radhës, gjykata do të aplikojë gjoba.
Ndërkohë, Ilir Meta deklaroi se nuk i janë vënë në dispozicion të gjitha materialet hetimore, duke pretenduar se i mungojnë 77 fashikuj, përkundrejt 55 fashikujve që sipas tij janë dorëzuar. Nga ana e tij, prokurori Sotir Kllapi propozoi që pala mbrojtëse të pajiset me kopje në CD të të gjitha akteve të dosjes për të garantuar vijimin e procesit.
Ilir Meta ndodhet në paraburgim që prej muajit tetor 2024. Ai përballet me akuza për korrupsion, pastrim parash dhe fshehje pasurie, në lidhje me dosjen CEZ/DIA dhe lobimin në SHBA.
Përditësime
Ish-presidenti Ilir Meta kontestoi ashpër procedurën gjyqësore në seancën e fundit, duke akuzuar trupën gjykuese se i mohoi të drejtën për të folur. Në përgjigje të pretendimeve të mbrojtjes për mungesë dokumentacioni, prokurori Sotir Kllapi konfirmoi gatishmërinë e organit të akuzës për të dorëzuar të gjitha materialet hetimore në formatin digjital CD.