Jeton Zulfaj, kryenegociatori i sapoemëruar i Republikës së Kosovës me Bashkimin Evropian dhe koordinator kombëtar për Instrumentin e Reformës dhe Rritjes, zhvilloi më 25 mars 2026 takimin e parë zyrtar nga marrja e mandatit me Eva Palatova, shefe në detyrë e Zyrës së Bashkimit Evropian në Kosovë.
Gjatë takimit, Zulfaj rikonfirmoi përkushtimin strategjik të Kosovës për anëtarësim në Bashkimin Evropian. Ai theksoi se mandati i tij do të udhëhiqet nga rezultatet dhe përmbushja e plotë e obligimeve në kuadër të Planit të Rritjes.
Zulfaj shprehu gatishmërinë e Kosovës për të punuar në koordinim të ngushtë me institucionet e BE-së, për të siguruar përparim të qëndrueshëm në reforma dhe përpjekje të vazhdueshme në zbatimin e veprimeve pas ratifikimit të marrëveshjeve.
Palatova e uroi Zulfajn për emërimin dhe rikonfirmoi mbështetjen e vazhdueshme të Bashkimit Evropian për agjendën e reformave në Kosovë. Diskutimi u përqendrua në gjendjen aktuale të procesit të integrimit evropian.
Duke u ndier i vetëdijshëm për vonesat, Zulfaj premtoi maksimumin për të përmbushur çdo hap të Planit të Rritjes, duke e kthyer në rezultate konkrete. Ai e cilësoi marrjen e statusit të vendit kandidat dhe avancimin në integrim si objektiv kryesor të qeverisë.
Në përfundim, Zulfaj falënderoi Palatovën për vizitën dhe bashkëpunimin e vazhdueshëm.