Në Gjykatën Speciale në Hagë ka filluar faza e deklaratave përfundimtare në procesin gjyqësor ndaj Hashim Thaçit, Bashkim Smakajt, Isni Kilajt, Fadil Fazliut dhe Hajredin Kuçit. Të gjithë të akuzuarit përballen me akuza për vepra penale kundër administrimit të drejtësisë.
Kryeprokurorja e Specializuar, Kimberly West, vlerësoi se rasti është i komplikuar për shkak të përpjekjeve të vazhdueshme për të ndikuar te dëshmitarët. Sipas prokurorëvë, Hashim Thaçi, duke u përballur me mundësinë e një dënimi të gjatë për krime lufte dhe krime kundër njerëzimit, ka formuar grupe me të bashkëakuzuarit për të orientuar dëshmitë. West theksoi se ekzistojnë prova të shumta, përfshirë dokumente dhe orë të tëra incizimesh, të cilat dëshmojnë këto ndërhyrje.
Sipas Prokurorisë, Thaçi u jepte udhëzime të hollësishme të bashkëakuzuarve gjatë vizitave në paraburgim. Udhëzimet përfshinin mënyrën se si dëshmitarët duhet të ndryshonin dëshmitë e tyre, duke u sugjeruar që të pretendonin se deklaratat e mëparshme përmbanin gabime përkthimi ose ishin pasojë e lodhjes. Po ashtu, prokurorja deklaroi se Thaçi ka udhëzuar të bashkëakuzuarit për çështje që lidhen me hierarkinë dhe strukturën e UÇK-së, me qëllim që të orientonte përgjegjësinë larg vetes.
West vlerësoi se këto veprime janë bërë për muaj të tërë dhe përbëjnë një shpërfillje të rregullave që synojnë mbrojtjen e integritetit të procesit gjyqësor.
Përditësime
Prokuroria e Specializuar zbardhi detaje mbi mënyrën e komunikimit për ndikimin te dëshmitarët. Prokurorja Kimberly West konfirmoi se dëshmitë janë printuar brenda qendrës së paraburgimit për t'u diskutuar gjatë vizitave të rregullta. Udhëzimet e Hashim Thaçit ndaj të bashkëakuzuarve kanë përfshirë ndryshime specifike në versionet e dëshmitarëve, duke synuar zbehjen e rolit të tij komandues në hierarkinë e UÇK-së. Dokumentet e paraqitura tregojnë se ndërhyrjet përfshinin edhe ndryshimin e vendndodhjes së Thaçit në zonat ku pretendohet se janë kryer krimet.