Ministria e Infrastrukturës dhe Transportit ka ndërmarrë një masë kufizuese për automjetet e transportit të mallrave me masë totale mbi 20 tonë. Ky vendim është marrë si pasojë e parashikimit të temperaturave të larta, të cilat pritet të jenë 32 gradë Celsius ose më shumë gjatë ditës së sotme, më 05 gusht 2026.
Kufizimi i përkohshëm do të zbatohet ekskluzivisht në autoudhë, ku qarkullimi i këtyre mjeteve ndalohet në fashën orare nga ora 11:00 deri në 17:30. Ndërkohë, në rrugët nacionale (magjistrale), rajonale dhe lidhëse, qarkullimi i automjeteve të transportit të rëndë do të lejohet pa asnjë kufizim.
Nga ky vendim përjashtohen kategoritë e mëposhtme, të cilat mund të qarkullojnë lirisht:
• Automjetet e organeve të rendit dhe sigurisë publike;
• Automjetet e shërbimeve emergjente;
• Automjetet e institucioneve shëndetësore.
Ministria ka bërë thirrje për të gjithë operatorët dhe ngasësit që të respektojnë këtë kufizim dhe të planifikojnë lëvizjet e tyre në përputhje me orarin e përcaktuar, për të garantuar sigurinë rrugore gjatë ditëve me temperatura të larta.