Kujtim Gashi, kandidat për deputet nga radhët e Partisë Demokratike të Kosovës (PDK), humbi 2.358 vota pas rinumërimit të votave në zgjedhjet e fundit.
Gashi reagoi përmes një postimi në Facebook, ku shprehu shqetësimin për ndryshimet e vërejtura gjatë rinumërimit. Ai theksoi se mbi çdo rezultat zgjedhor qëndron ruajtja e dinjitetit personal, politik dhe institucional.
"Si kandidat, kam ndjekur me shqetësim ndryshimet e vërejtura gjatë rinumërimit të votave, duke theksuar njëkohësisht se distancohem plotësisht nga çdo veprim apo praktikë që cenon integritetin e procesit zgjedhor", shkroi Gashi.
Ai nënvizoi se çdo paqartësi dëmton besimin e qytetarëve dhe kërkon sqarim të plotë institucional. Kërkimi i transparencës dhe llogaridhënies është detyrim qytetar, sipas tij.
Gashi deklaroi se vetëm përmes sqarimit të plotë të çdo dileme dhe respektimit të vullnetit të votuesve deri në numërimin e kutisë së fundit mund të forcohet demokracia në vend. Ai premtoi të vazhdojë të qëndrojë në anën e dinjitetit, drejtësisë dhe demokracisë.