Ministrja e Arsimit Mirela Kumbaro foli në seancën plenare të Kuvendit më 9 prill 2026, gjatë një seance pyetje-përgjigjeje të kërkuar nga deputetja Erisa Xhixho. Ajo sqaroi ndryshimin ligjor të miratuar në mars në ligjin për arsimin parauniversitar, i cili siguron trajtim financiar të barabartë për 6761 punonjës arsimorë të punësuar me kohë të plotë dhe pa afat para datës 1 mars 2017.
Këta punonjës zotërojnë diploma nga programe studimi që, për shkak të kohëzgjatjes, nuk ekuivalentoheshin me 8 semestra sipas kuadrit ligjor në fuqi. Ndryshimi i ligjit adreson diferencën në paga, e cila u bë më e dukshme pas rritjes së pagës mesatare të mësuesve në rreth 950 euro në korrik 2024.
Ministrja Kumbaro theksoi se Ministria e Arsimit ka qenë e angazhuar që në fillim për zgjidhjen e kësaj çështjeje. Megjithatë, ajo u dërgua në Gjykatën Kushtetuese nga një grup interesi, duke krijuar një bllokim të përkohshëm. Pas vendimit të kësaj gjykate, çështja u mor me prioritet, në bashkëpunim me stafin ministerial, deputetët e Kuvendit dhe Komisionin për Edukimin.