Albin Kurti, kryeministër i Kosovës, foli në një konferencë për media rreth dialogut Kosovë-Serbi dhe diskutimeve me presidentin francez Emmanuel Macron për këtë proces.
Ai theksoi se fillimisht duhet hiqur letra e ish-kryeministres serbe Ana Bërnabiq, e datës 13 dhjetor 2023, me të cilën Serbia njoftoi Bashkimin Evropian se nuk respekton integritetin territorial të Kosovës. Kurti vuri në dukje se kjo letër pengon mirëbesimin dhe sigurinë juridike të nevojshme për dialogun.
Sipas tij, pas kësaj duhet nënshkruar marrëveshja bazike e Brukselit me aneksin e zbatimit të Ohrit. "Ne nuk jemi kundër serbëve, Serbia është kundër nesh, dhe serbët në Kosovë i trajtojmë si qytetarë të Republikës, dhe nuk harrojmë që ka minoritete të tjera", tha Kurti.
Ai përsëriti se këto kushte i komunikon në çdo takim me ndërkombëtarët. Gjithashtu, kërkoi që Milan Radoiçiq t’i dorëzohet organeve të sigurisë dhe drejtësisë në Kosovë.