Albin Kurti, kryeministri në detyrë i Kosovës, mirëpriti të mërkurën ambasadorin William Walker, ish-shef i Misionit Verifikues të OSBE-së, në prag të shënimit të 27-vjetorit të Masakrës së Reçakut.
Walker ishte i shoqëruar nga bashkëshortja dhe bashkëpunëtorë. Gjatë bisedës së përzemërt, Kurti u shpreh se është gjithmonë i lumtur ta mirëpresë dhe ta takojë ambasadorin Walker, duke shprehur mirënjohjen e tij të thellë për rolin historik që ai ka pasur për popullin e Kosovës në ekspozimin e krimeve gjenocidale të Serbisë, për miqësinë e çmuar që vazhdon dhe për angazhimin e tij të pareshtur në shërbim të së vërtetës dhe drejtësisë.
Të dy bashkëbiseduan për zhvillimet e fundit në vend, si dhe për përgatitjet për ceremoninë përkujtimore të Masakrës së Reçakut, e cila do të mbahet të enjten në komunën e Shtimes, ku Kurti dhe Walker do të marrin pjesë.
Walker falënderoi për takimin dhe bisedën, duke uruar Kurtin për rezultatin zgjedhor dhe fitoren në zgjedhjet e 28 dhjetorit 2025.
Përditësime
Zyra e Kryeministrit konfirmoi falënderimin dhe urimin e ambasadorit Walker për kryeministrin Kurti