Albin Kurti, kryeministër në detyrë i Kosovës, ka pritur në Prishtinë një grup krijuesish shqiptarë nga Mali i Zi, të cilët marrin pjesë në edicionin e katërt të Festivalit Poetik të Prishtinës (21-25 janar 2026), të organizuar nga ObserverKult.
Takimi u zhvillua së bashku me deputeten Arbëreshë Kryeziu-Hyseni. Krijuesit e pranishëm ishin Ali Daci, Nikollë Berishaj, Ismet Kallaba, Mark Lucgjonaj, Flutur Mustafa-Pllana dhe Ardita Rexha.
Në bisedë u trajtuan bashkëpunimet kulturore, lidhjet që letërsia i mban të gjalla mes hapësirave tona, si dhe roli i festivalit në forcimin e komunikimit përmes fjalës artistike. Theksi u vu në prezantimin e letërsisë shqipe nga Mali i Zi brenda programit të festivalit.
Kurti theksoi se poezia shqipe nga Plava e Gucia, Ana e Malit dhe Kraja, Tuzi e Ulqini është dëshmi e qëndrueshmërisë së gjuhës dhe e dinjitetit kulturor, një mënyrë për ta ruajtur kujtesën dhe për ta shtrirë praninë tonë shpirtërore ndër breza, duke e bërë vargun urë nga një vendbanim te tjetri, nga një kujtim te një e ardhme e përbashkët.
Ky takim vjen pas kthimit të Kurtit nga Davos, sipas një burimi.